Балык Бистәсе буенча журналистлар берлеге әгъзалары әдәби очрашуда катнашты
Балык Бистәсе районы үзәк китапханәсендә күренекле татар язучысы һәм җәмәгать эшлеклесе, Г.Тукай исемендәге Дәүләт премиясе, Төркиянең халыкара бүләге, Азия һәм Африка илләренең «Лотос» премиясе, А.Платонов исемендәге, М.Шолохов исемендәге халыкара бүләкләр иясе, Россиянең атказанган мәдәният хезмәткәре Ринат Сафа улы Мөхәммәдиев белән очрашу кичәсе булып узды.
Кичәдә Балык Бистәсе районы буенча журналистлар берлеге әгъзалары, китапханәчеләр, Аксакаллар шурасы вәкилләре катнашты. Очрашуны үзәкләштерелгән китапханәләр системасы җитәкчесе Рәхимә Рәшитова ачып җибәрде. Аннан сүзне танылган шагыйрь, Татарстанның атказанган мәдәният хезмәткәре, Татарстан Язучылар берлеге әгъзасы, Татарстан журналитслар берлеге әгъзасы, күпсанлы җырлар авторы, күп еллар «Авыл офыклары» газетасының баш мөхәррире булып эшләгән якташыбыз Вазыйх Фатыйхов дәвам итте. Кунакларны район администрациясе башлыгы исеменнән Балык Бистәсе район мәдәният бүлеге башлыгы Лилия Кәримуллина да тәбрикләде. Чарада Татарстан Республикасы Милли китапханәсенең фәнни-методик бүлеге баш китапханәчесе Зәйнәп Җамалиева да катнашты.
Эчкерсез әңгәмә вакытында райондашларыбыз үзләренең истәлекләре белән бүлеште, китап сөючеләр кунагыбыз Ринат агага кызыксындырган сорауларын бирде.
Татарстанның атказанган мәдәният хезмәткәре, райондашыбыз Марсель Җәләлов очрашуны гармун моңнарына күмде. Әнәс Низамов, китапханәче Индира Илалова башкаруындагы җырлар кичәбезгә тагы да ямь өстәде.
Иҗади кичә бик җылы, күңелле узды. Чарага килгән тамашачыларыбыз сөенеп, рухи азык алып, бәйрәмне оештыручыларга рәхмәт әйтеп таралыштылар.
Автор: Татарстан Журналистлар берлеге әгъзасы Рәзилә Мөхәммәтрәхимова.